💫
🎼🎻
പാട്ടുവന്ന വഴി
🎙

പ്രസിദ്ധ സംവിധായകൻ ശ്രീ ഹരിഹരൻ രാജഹംസം എന്ന ചിത്രം സംവിധാനം ചെയ്യാൻ തീരുമാനിച്ച കാലം. ഗാനങ്ങൾ എഴുതാൻ ഏൽപ്പിച്ചത് വയലാറിനെ…. സിനിമയുടെ ക്ലൈമാക്സിൽ ഒരു ശോകഗാനം വേണം… നായികയെ കഠിനമായി പ്രണയിക്കുന്ന കാമുകനെ സ്വീകരിക്കാൻ തയ്യാറാകാത്ത കഥാസന്ദർഭത്തിൽ നായകൻ പാടുന്ന ഗാനം ഹൃദയസ്പർശിയാവണം. പാട്ട് എഴുതി കിട്ടി വായിച്ചു നോക്കിയ ഹരിഹരന് നിരാശ…ഗാനം താനുദ്ദേശിച്ച നിലവാരത്തിലെത്തിയില്ല. എന്തു ചെയ്യും.. വയലാറിനോട് പാട്ടു മോശമായിപ്പോയി എന്നു പറയാനൊക്കുമോ…. പറയാതിരിക്കാനൊക്കുമോ… ഒരു പക്ഷേ, അതുവരെ ഒരു മനുഷ്യനും പാട്ടു മാറ്റിയെഴുതണമെന്ന് വയലാറിനോടു പറഞ്ഞിട്ടുണ്ടാകില്ല. “എന്തിനായ് വന്നു നീ …” എന്നായിരുന്നു ഗാനത്തിന്റെ തുടക്കം. പാട്ട് തിരുത്തിയെഴുതിച്ചില്ലെങ്കിൽ അത് തന്റെ സിനിമയെ ബാധിക്കും… എന്തു പോംവഴി എന്നാലോചിച്ചാലോചിച്ച് ഒടുവിൽ ഉള്ള കാര്യം വയലാറിനോടു തുറന്നു പറയാൻ തന്നെ ഹരിഹരൻ തീരുമാനിച്ചു. അന്നും തന്റേടിയായിരുന്നു ഹരിഹരൻ … സംവിധായകന്റെ ആവശ്യം കേട്ട് വയലാർ ഒരക്ഷരം മിണ്ടിയില്ല… എഴുതാമെന്നോ പറ്റില്ലെന്നോ പറഞ്ഞുമില്ല.

പിറ്റേന്നു അതിരാവിലെ രണ്ടര മൂന്നു മണിക്ക് ഹരിഹരന് ഒരു ഫോൺ ... ഫോണെടുത്തപ്പോൾ മറ്റേത്തലയ്ക്കൽ വയലാർ ...."ങാ...ഞാൻ വയലാർ ... പാട്ടു ഞാൻ മാറ്റിയെഴുതി ... എഴുതിയെടുത്തോളൂ .." എന്നു പറഞ്ഞ് അദ്ദേഹം വരികൾ വായിച്ചു കൊടുത്തു.  ഉറക്കച്ചടവിൽ പേനയും പേപ്പറും തപ്പിയെടുത്ത് ഹരിഹരൻ ആ വരികൾ എഴുതിയെടുത്തു. "സന്യാസിനീ നിൻ പുണ്യാശ്രമത്തിൽ ഞാൻ

സന്ധ്യാ പുഷ്പവുമായ് വന്നു…. ” പല്ലവി കേട്ടപ്പോൾ തന്നെ ഉറക്കമെല്ലാം പമ്പ കടന്നു മുഖം വിടർന്നു …. അതേ… ഇതു തന്നെയാണ് ഈ സന്ദർഭത്തിനു വേണ്ട, താനാഗ്രഹിച്ച ഗാനം …!!

ഗാനം പിന്നെ സംഗീതം ചെയ്യാൻ ദേവരാജൻ മാസ്റ്ററെ ഏൽപ്പിച്ചു… രണ്ടു ദിവസം കഴിഞ്ഞ് പാട്ടുകേൾക്കാൻ മാസ്റ്ററുടെ വീട്ടിൽ ഹരിഹരൻ ചെന്നു … ആവശ്യം പറഞ്ഞു… “കേട്ടിട്ട് തനിക്ക് തനിക്കെന്തോ ചെയ്യാനാ ….. പാട്ടു കേൾക്കണമെങ്കിൽ റെക്കോർഡു ചെയ്യുമ്പോൾ സ്റ്റുഡിയോവിൽ വരണം … ഇവിടെയിരുന്നു കേൾക്കാനൊക്കില്ല.” ഇതായിരുന്നു മാസ്റ്ററുടെ പ്രതികരണം. ഹരിഹരനു ആ ന്യായം മനസ്സിലായില്ല. തന്റെ ചിത്രത്തിൽ ഉൾപ്പെടുത്താൻ തയ്യാറാക്കിയ ഗാനം കേൾക്കാൻ തനിക്ക് അവകാശമില്ലേ … ഹരിഹരൻ പല ന്യായങ്ങളും വാദിച്ചു നോക്കിയെങ്കിലും മാസ്റ്റർ വഴങ്ങിയില്ല. ഒടുവിൽ അദ്ദേഹം ക്ഷുഭിതനായി ഇറങ്ങിപ്പോയി…

പിന്നെ, ദിവസങ്ങൾ കഴിഞ്ഞ് റിക്കോർഡിംഗ് സ്റ്റുഡിയോവിലെ കൺസോളിലിരുന്ന് ആ ഗാനം ഹരിഹരൻ കേട്ടു …. പാട്ടു തീർന്ന യുടൻ നിറഞ്ഞ കണ്ണുകളുമായി ദേവരാജൻ മാസ്റ്ററുടെ കാൽക്കൽ ഒരു സാഷ്ടാംഗ പ്രണാമം നൽകാതിരിക്കാൻ ഹരിഹരനു കഴിഞ്ഞില്ല… ഇതിൽ കൂടുതൽ അനുയോജ്യമായൊരീണം ആ ഗാനത്തിനു നൽകാനില്ലായിരുന്നു. ഒരു സംവിധായകൻ കാണുന്നതിനപ്പുറത്ത് കാണാൻ കഴിയുന്ന സംഗീത സംവിധായകൻ ദേവരാജൻ മാസ്റ്ററിനെപ്പോലെ മറ്റൊരാളില്ല എന്ന സത്യം അന്നു തിരിച്ചറിഞ്ഞൂ ശ്രീ. ഹരിഹരൻ. മലയാളത്തിലെ എക്കാലത്തെയും മികച്ച ഗാനങ്ങളിലൊന്നായ ഈ ഗാനത്തിന്റെ പിറവി യിങ്ങനെയായിരുന്നു.
വയലാർ തന്നെ മനസ്സിൽ ഉദ്ദേശിച്ചാണ് ഈ ഗാനമെഴുതിയതെന്ന് അദ്ദേഹത്തിന്റെ ആദ്യ ഭാര്യ ചന്ദ്രമതി തമ്പുരാട്ടി മരിക്കുന്നതു വരെ വിശ്വസിച്ചിരുന്നു.
🌾